Eichar a andar esti programa foi posible gracias a l-ayuda económica que la Fundación pal fomentu n-Asturias de la investigación científica aplicada ya la tecnoloxía (Ficyt) concedíu al Conceyu Cangas del Narcea, ya a la colaboración de la empresa Ciencia divertida na súa execución.

Las actividades, dirixidas al alumnáu de primer ya segundu ciclu de primaria de todu-l conceyu, van desenvolvese nos propios centros educativos ya van consistir en fer dientro del aula distintos talleres de carácter prácticu ya experimental. Al traviés d-experiencias entretenidas ya participativas ande los más nuevos deprenderán las súas primeras nociones sobre l-universu, la galaxa, el sistema solar, los astros...

Esta nun vei ser la única actividá que vei desenvolvese na sumana que vien dientro del proxectu Ciencia na ciudá, porque los días 16 ya 17 del mes muertu, de cinco a seis de la tarde, van celebrase na Biblioteca del Conceyu Cangas actividades relacionadas cona vida ya la obra de Charles Darwin, cono que nos vamos xuntar a la conmemoración del bicentenariu de la súa nacencia ya al 150 aniversariu de la publicación de la súa obra "L-orixe de las especies".

Esti programa desenvolvíulu la Fundación Caxa Rural ya cunta cona financiación de la Fundación española pa la ciencia ya la tecnoloxía (Fecyt), que depende del Ministeriu de Ciencia ya Tecnoloxía cono númaru de referencia FCT-09-1478.

Trátase de talleres teatralizaos, mui prácticos, educativos ya divulgativos sobre la figura de Darwin ya la súa teoría de la evolución ya van dirixíos sobre todo a nenos ya nenas d-ente 10 ya 12 años d-edá.